Allt að gerast!

Það mætti halda að einhver frá Kína hefði lesið síðustu bloggfærslu því að núna er allt að gerast!

LOAn er komin :)
Þegar við vorum á Patreksfirði á leiðinni að kíkja á lundana á Látrabjargi á miðvikudaginn fengum við símtal frá Íslenskri Ættleiðingu um að formlega samþykkið (LOA) væri komið. Við fórum svo í morgun og skrifuðum undir, og að sjálfsögðu voru teknar myndir, enda ansi merkilegur áfangi í þessu ferli okkar.

Þetta þýðir að líklegast förum við eftir um það bil mánuð til Kína!
Við fáum svo nánari upplýsingar um hvenær við getum farið (Kína þarf að gefa út ferðaleyfi og það tekur venjulega um mánuð, stundum styttra, stundum aðeins lengur) eftir einhverja daga.

Við erum ekkert smá glöð með þetta, því að við vorum búin að búast við að þurfa að bíða í mánuð í viðbót eftir LOAnu.

Annars er ein stórfrétt í viðbót - við erum búin að ákveða nafn á strákinn!
Kári Björn varð fyrir valinu.
Við ætlum líka að halda Ming Ji nafninu, hann á þetta nafn og við ætlum ekki að taka það af honum. Hins vegar gerum við ekki ráð fyrir að nota það svona dags daglega, hann getur svo bara valið sjálfur þegar hann er orðinn eldri hvort hann vilji nota það eða ekki. Fullt nafn verður því Kári Björn Ming Ji Brjánsson.

Núna þurfum við bara að spýta í lófana og drífa okkur í að klára allt sem á eftir að gera áður en við förum til Kína til að sækja Kára :)