Forboðna borgin og heimaeldaður matur

Í Kína býr um 1,3 milljarður manna. Í dag komu þeir, að því er okkur virtist, allir saman á Torgi hins himneska friðar og í Forboðnu borginni. Mögulega voru þeir að heiðra okkur með nærveru sinni, enda dagurinn okkar ætlaður til að skoða þessa tvo staði. Við skoðuðum torgið reyndar frekar lítið, enda tók tímann sinn að skoða Forboðnu borgina.

Forboðna borgin var öldum saman miðdepill heimsins hvað Kínverja varðaði, enda bjó keisarinn í Kína í þessari risavöxnu höll, svona þegar hann var ekki að njóta lífsins í Sumarhöllinni sinni. Við flæddum með gríðarlegum fjölda kínverskra ferðamanna sem voru að skoða höllina í dag. Við fengum reyndar ekki að fara inn í byggingarnar, svo við urðum að rölta um og skoða utanfrá, auk þess sem við gátum einstaka sinnum kíkt inn um glugga og hurðir.

Eftir heimsóknina í Forboðnu borgina tók við hjólaferð um dæmigert gamalt kínverskt hverfi. Þar eru lágreist hús sem byggð eru í kassa í kringum garð. Í gamla daga bjó ein fjölskylda í hverju húsi, meira að segja fjölskyldur sem voru ekkert sérstaklega ríkar. Núna deila margar fjölskyldur hverju húsi. Eftir byltinguna ákváðu yfirvöld að allir skyldu vera rosalega jafnir, og tóku öll húsin eignarnámi. Ríkið hefur síðar skilað um 20% af húsunum aftur til réttmætra eigenda, en restin er í eigu ríkisins og íbúarnir fá að búa þar frekar ódýrt, eins og sardínur í dós.

Hjólatúrinn var áreynslulaus fyrir okkur, enda ferðuðumst við með rickshaw-hjólum ásamt leiðsögukonunni okkar, svo aðrir sáu um að hjóla á meðan við nutum útsýnisins. Við heimsóttum tvö hús í ferðinni. Í öðru bjó listamaður með fjölskyldu sinni (ásamt fleirum) og fræddi hann okkur (í gegnum leiðsögumann sem túlkaði) um húsið. Í því síðara bjó indælis kínversk „amma“ sem er sest í helgan stein en hefur tekjur af því að elda ofan í ferðamenn eins og okkur.

Þarna fengum við besta matinn sem við höfum fengið í ferðinni hingað til. Eins og tíðkast voru nokkrir réttir á borðum fyrir okkur og leiðsögumanninn. Auk hrísgrjóna tíðkast að bjóða upp á einum fleiri rétt en gestirnir við borðið eru margir, svo við fengum fjóra rétti. Fyrsti rétturinn sem kom á borðið samanstóð af hvítlauksspírum sem voru eldaðar með smá svínakjötsstrimlum. Svo kom kjúklingaréttur með chili og agúrkum, svo fínt strimlaðar kartöflur og að lokum dumplings með svínakjöti og kínakáli. Við borðuðum okkur pakksödd, og vorum frekar montin þegar leiðsögumaðurinn sagði að við værum klár að nota prjóna, þar sem við vorum ekkert sérstaklega á þeirri skoðun fyrirfram.

Eftir þessa heimsókn fórum við aftur á hótelið og slöppuðum aðeins af. Eftir klukkutíma ætlum við að fara á einhverskonar blöndu af leiksýningu og kung-fu-sýningu með Liu Lifang, leiðsögukonunni okkar hér í Beijing. Það verður vonandi skemmtilegt. Okkur skilst að annað hvort tali leikararnir ensku, eða að það verði enskur texti. Hvort sem er verður frábært. Við höfum að minnsta kosti aldrei séð leiksýningu með enskum texta (subtitles)!